თეიმურაზ ლანჩავა - ეს შემოდგომაც ჩათავდა

ეს შემოდგომაც ჩათავდა

ფოთოლცვენით და ნისლით,

თუ მარტოობას დანებდით,

ვეღარაფერი გიხსნით.

თუ თოვლმა დაგიმარტოვათ,

არ აგამჩატათ ფიფქით

და ფიფქებს არ აედევნეთ

განცდებითა და ფიქრით.

სევდა იქნება სტუმარი

აალებული ბუხრის,

დაგიმორჩილებთ სიმშვიდე,

ტყვე შეიქნებით მწუხრის.

ეს შემოდგომაც ჩათავდა,

სევდამ დაგჯაბნათ მგონი,

აღარ ამოდის ბუხრიდან

ცეცხლის კვამლი და ბოლი.