გიორგი ქუჩიშვილი - მეკვლე

მეკვლე ვარ! კარი გამიღეთ! -

მოვდივარ გახარებული;

უწინამც თვალი დამიდგეს,

თუ დამხვდით აცრემლებული...

მოვალ, თან მომაქვს სიამე,

გულითა მხიარულითა!

ღმერთმა გაშოროთ სიმწარე,

აგავსოთ ტკბილეულითა!

იცოცხლეთ, იბედნიერეთ,

ნუ დაეცემით სულითა;

წინ დახვდით ჭირს და განსაცდელს

გაუტეხელი გულითა.

მოვდივარ! მომიხარიან!

გილოცავთ ხონჩა ძღვენითა!

ღმერთმა მრავალს წელს დაგასწროთ

აგავსოთ შვება-ლხენითა!