მარიამ წიკლაური - ნანინა

ნანა, ჩემო პაწაწინავ,

ჩემო მზევ და სახელო.

დედის გულში უფლის ხელით 

ანთებულო სანთელო.

ნანა, უფლის საჩუქარო,

ნანა, ჩემო ხალისო,

შენითა მაქვს სიხარული

და იმედი ხვალისო.

დაიძინე, თვალს დაგაფენს

ანგელოსი ძილსაო,

ჯვარს გადაგწერს საკეთილოდ

ლამაზ სახე-პირსაო.

ნანა, ჩემო სიცოცხლეო,

ნანა, დედის გულსაო,

სათნოებავ, ზეციერო,

ჩემი შვილის სულსაო.

ნანა, ნანა, დაიძინე

მშვიდად, ჩემო პატარავ,

შენით იქნებ საქართველომ 

შეძლოს ლელოს გატანა.