პაოლო იაშვილი - მეღორის ლოცვა

უფალო! უსმინე შავარდენს,

მის ხელით გიგზავნი ბარათს,

მიშველე ღორებში ჩავარდნილს,

ღორებში დარჩენილს მარად.

როგორც რომ ბურვაკი პალოზე

მინდორში ბაწარით აბია,

მარტო ვარ, უფალო, დალოცე

მეღორე ცრემლების ყლაპია!

უფალო! მომეცი სამხარი

ძაღლივით ამოსულს ცაზე,

და შენი პერანგი ნახმარი

ჩამაცვი ცოდვიან ტანზე.

მომეცი ბავშვებში ჩარევის

და მათთან თამაშის ნება.

უფალო! შენს გარდა არავის

არა აქვს ამის უფლება.

ფიქრები სამწყემსო ღორებზე

ყოველდღე ცრემლებით მსჯიდა.

უფალო, გალავნის ყორეზე

დამნიშნე ბეღურა ჩიტად.