ანა კალანდაძე - ბეთანიის გზაზე

ასკილი, მოცხარი, მოცვი...

გზადაგზა კუნელიც გვხვდება...

აღარ წვიმს... ლამაზი მხრები

გაშალეს ლამაზმა მთებმა...

მივდივართ, მივდივართ, ცივი,

სექტემბრის ქარები ქრიან...

სველ გზაზე წაბლის და იფნის

და მუხის ფოთლები ყრია...

მოვედით სამადლოს ხევთან...

ნისლებში დანთქმულა ისიც...

მე მინდა... სულ ვიყო შენთან,

როგორც ეს მთები და ნისლი!

ასკილი, მოცხარი, მოცვი...

გზადაგზა კუნელიც გვხვდება...

აღარ წვიმს, ლამაზი მხრები

გაშალეს ლამაზმა მთებმა...