თემურ ჩალაბაშვილი - სანთელი

შენ სანთელი ხარ უფლის ხმობილი,

ო, პაწაწინა თაფლის სანთელო.

გყოლია მრევლი ხელაპყრობილი -

შენ შეგინახავს ეს საქართველო.

ჩამოგიქროლებს სული ტაძართა

და ეგ სიწმინდე გასაკვირია.

ბევრჯერ მომხდურმა ცრემლი წაგართვა,

ბევრჯერ დაღვრილხარ და გიტირია.

შენ სანთელი ხარ, სუსტი, უბრალო,

მაგრამ რამდენი კვნესა გიგრძვნია.

შენ საქართველოს ჭირისუფალო,

ბედნიერი ხარ, წვა შეგიძლია...