ვახტანგ ჯავახაძე - კარგად არ მახსოვს...

კარგად არ მახსოვს, არ ვიცი,

როგორ ბრწყინავდა სამყარო,

მარტი იდგა თუ მაისი,

დილა იყო თუ საღამო;

ვისხედით ჩამქრალ კოცონთან

თუ გიზგიზებდა მიხაკი,

ისევ და ისევ მომწონდი

თუ უკვე აღარ მიყვარდი;

რომელი ათასწლეული

გვიკაკუნებდა კარებზე,

სული მთხოვდა თუ სხეული,

შინაური თუ გარეშე;

ზღვარი ჩანდა თუ საზღვარი -

ზღვისფერი სანაპიროთი,

ცხადი იყო თუ სიზმარი,

ვიცინოდი თუ ვტიროდი...