მანანა ფრუიძე - სულის კივილით გამოგიტირე

სულის კივილით გამოგიტირე,

შენ, ჩემი სისხლის თანაზიარო,

სიუცხოვეში უხმოდ ვტიტინებ

ვინძლო, სიჩუმე დავაზიანო.

გაელვებაში გაქრი ანაზდად,

შენ მაცდურ იღბალს ბოლომდე ენდე,

შენ მიიცვალე ისე ლამაზად,

სიკვდილის ნატვრა დამჩემდა დღემდე;

გადამიახლე ყველა ტკივილი,

უნახაობის დარდი მაგიჟებს,

გამოგიტირე სულის კივილით,

ეხლა შენამდე ვითვლი ნაბიჯებს.

ფრთაჩამომწვარი პეპლის წადილით

(წერტილდასმული ტანჯვა-წამება)

მე მეჩვენება უფრო ადვილი

ჩემი ცისფერი გარდაცვალება...