ნიკო გომელაური - ვერაფერი გამიგია...

ვერაფერი გამიგია

ამ უზნეო ქალისა.

ნეკნი რისთვის გამიღია

თუ არ გამახალისა?

ვერაფერი გამიგია

ამ ტუტუცი კაცისა,

ძმობა როგორ დამირღვია,

ან რამ გაანარცისა?

ვერაფერი გამიგია

ამ უგონოდ მთვრალისა.

ჭიქა მე არ დამიღვრია,

რად ვერ გამითავისა?

ვერაფერი გამიგია

საკუთარი შვილისა.

არასოდეს გამირტყია,

გარდა ერთი სილისა.

ვერაფერი გამიგია

საკუთარი თავისა,

ცამეტი დღე - რა რიგია,

- ლექსი აღარ მაღირსა.

ვერაფერი გამიგია,

ამ უმეცარ ხალხისა.

„ყველას ვჯობნით“ - რას მიქვია

- სხვა ღირსია ავისა?

არაფერი გამიგია,

ვერაფერი ვერვისა.

ანდერძშიც კი ამიგია,

იმედი მაქვს ღმერთისა.